Skip to main content

நள விருந்து ஆசாமி




நெல்லை வீரராகவபுரத்தில் பிள்ளையார் கோவிலுக்கு எதிர் தெருவில் முதல்கடை நம்ம ஆஸ்தான டிபன் கடை!

குடிக்க கொடுக்கும் தாமிரபரணி தண்ணீருக்காகவே அங்கே தினம் தினம் சாப்பிடப்போவேன்.

சாப்பாட்டு விசயத்தில் "நள விருந்து ஆசாமி " நான்.

மார்கெட்டிங்க் நண்பர்கள் யாராவது உங்களுக்கு இருந்தால் அவர்களைக் கேளுங்கள். ஒவ்வொரு ஊருக்கும் ஒரு பிரசித்தியான ஹோட்டல் சொல்வார்கள்.

சைவம்/அசைவம் தனித்தனியாக பெரிய லிஸ்ட் கிடைக்கும்.

2005-06-களில் நானும் தான் குடுமி வச்ச பூசாரி என்பது போல, மார்கெட்டிங் ரெப் ஆக ஊர் சுற்றினேன்.

மார்கெட்டிங்காக தமிழகத்தின் எல்லா மாவட்டத்திற்கும் சுற்றினதில் எனக்கும்
சாப்பாட்டு ருசியறிந்து கடை தேர்ந்தெடுக்கும் பாக்கியம் இருந்தது,

திசையன்விளை தாயம்மா ஹோட்டல்/ களக்காடு நம்பி/விருதுநகர் பத்ரகாளி கோவில் பின்புறம் ஒரு பழைய ஹோட்டல்/கோவை அன்பு மெஸ்/மதுரை மதுரம் ஹோட்டல்/வாணியம் பாடி உசேன் / களியக்காவிளை தங்கம்/
இப்படி குறிப்பிட்டுச் சொல்ல அம்மாபேட்டையிலிருந்து ஓட்டபிடாரம் வரை (அ-ஓ) எல்லா ஊரிலும் எனக்கென்று ஒரு
பிரத்யோக கடை உண்டு!

கூடவரும் புதிய ரெப்-பை வாங்க நம்ம கடைன்னு கூட்டுப்போய் துண்டு மீன் என்னென்ன வெரைட்டி உண்டுன்னு பாடம் எடுத்து ,
எக்ஸ்ட்ரா அப்பளம்/எக்ஸ்ட்ரா கப் பாயாசம் / வாங்கிக் கொடுக்கும் வள்ளல் தனமெல்லாம் அங்கேதான் வாய்க்கும்.

ரெகுலர் கஸ்டமர். இந்தவார்த்தையின் மரியாதை அனுபவித்தவர்களுக்குத் தான் தெரியும். *ஹோட்டல்காரர்கள் மிகவும் நல்லவர்கள் நம்மை அடையாளமே தெரியாவிட்டாலும் ஒரு வணக்கத்தைப் போட்டால் விழுந்து விழுந்து கவனிப்பார்கள்.

%

இப்போ அப்படியே மேலே சொன்ன வீர்ராகவபுரம்.பிள்ளையார்கோவில்
தெருவுக்கு போகலாம்.

அய்யங்கார் ஹோட்டலுக்கே உரிய சுக்குகாபி/காரவடை/குட்டி தோசை/தேங்காய் சட்னிக்கு பெயர் சேர்த்தகடை. (அதென்ன பெயர் போன கடை?)

நெல்லையப்பர் வெள்ளித்தேர் 91-ல் தீப்பிடித்ததிலிருந்து / 80-களின் கடைசியில் முன்னீர்ப்பள்ளத்தில்
பாரதியார் வழித்தோன்றல் சங்கர்ராமன் வாழ்ந்த கதை வரைக்கும் பல அரிய சம்பவங்களை எட்டு குட்டிதோசையை கெட்டிச்சட்னி சாம்பார் தொட்டு சாப்பிட்டுக்கொண்டே பேசக் கேட்கலாம்

விருத்தமாய் ஒரு வட்டக்கப்பில் சுக்கு காபி! காரவடை! ராமு அண்ணார் ஒரு நல்ல கதை சொல்லி துண்டு துண்டாய் விழும் வார்த்தைகளுக்கு இடையே திருநெல்வேலியை அங்குலம் அங்குலமாய் விவரிப்பார்.

பழைய தின்னவேலி ராவ்பகதூர்கள் கதையெல்லாம் கூட அங்கே பேசப்படும். நான் கொஞ்சம் கதை விரும்பியும் கூட 

டாக்டர்.ஆசுகவி ( Asukavi ) தான் இந்தக்கடையை அறிமுகம் செய்து வைத்தார்.

எனக்கும் அய்யங்கார் கடைக்கும் இடையே இருக்கும் ஒரு கிலோ மீட்டர் இடைவெளியை சாப்பாட்டு ருசிக்காக கடப்பது வாடிக்கையாகிவிட்டது!

திரும்பும் வழியில் சந்திராவில் இளஞ்சூடாய் அல்வா! ஒரு குத்துக்கை ஓசி மிச்சர்.

வாழ்க்கையில் கொஞ்சம் சாப்பாட்டுக்காகவும் வாழ்ந்தால் தப்பில்லை என்பதை உணர்ந்தவனாதலால் 

%
வழக்கம் போல நேற்று இரவு சுக்குகாபி அரட்டை முடித்து அறைக்கு வந்தபின் தான் கவனித்தேன். அம்முக்குட்டியை காணவில்லை (ஆண்ட்ராய்டுக்கு வைத்திருக்கும் செல்லப் பெயர்) .

*

இலங்கையில் அனுமனைச் இராவணவதத்தின் பின் சந்தித்த சீதாபிராட்டி

"இங்குள்ள அரண்மனை
அம்மியில் மசாலா அரைத்தால் அப்படி ஒரு ருசி! வரும் போது இந்த அம்மியைத் தூக்கிக் கொண்டு வந்துவிடென்று" கட்டளையிட்டதாக ஒரு சுவா(ருசி)ரசியக் கதை நேற்றிரவு
கேட்ட மயக்கத்தில் அய்யங்கார் ஓட்டலிலே போனை மறந்துவிட்டு வந்துவிட்டேன்.

எதற்கும் இருக்கட்டுமென இரவு மட்டும்
முகநூலை
டீ-ஆக்டிவ் செய்துவிட்டேன்.

காலை முதல் வேலையாக, ராமண்ணாவுக்கு போன் செய்து/அம்முக்குட்டியின் பாதுகாப்புக்கு உத்திரவாதம் செய்து/ ஓட்டலுக்குச் செல்ல போனைக் கொடுத்துவிட்டார்!

அப்படியே
நாலு தோசை ரெண்டு காரவடை பார்சல் வாங்கிக் கொண்டேன்.

" குடிக்க கொஞ்சம் தண்ணி தாங்க அண்ணாச்சி!"

-கார்த்திக் .புகழேந்தி

Comments

Popular posts from this blog

‘நல்ல சுழி சல்லி மாடு’ - ஜல்லிக்கட்டு ஒரு கிராமத்தான் கதை

            பால்க்காரக் கோனாரிடம் கதைகேக்கப் போனால் அவர் முதலில் சொல்ல ஆரம்பிக்கிறது மாடுகளின் கதையைத்தான். அப்படி மாடுமாடாய் வரிசைக்கு நிறுத்தி அவர் சொன்ன கதைகளில் ஒன்றுதான் அய்யமுத்துத் தாத்தனின் கதை. எங்கள் வட்டாரமான திருநெல்வேலியில் சல்லிக்கட்டு விளையாட்டுக்கென்று காளை வளர்ப்பவர்கள் ஒன்றிரண்டு பேர் இருந்தார்கள். அய்யமுத்து தாத்தா அதிலொருத்தர். நல்ல வளர்த்தியான பாராசாரிக் குதிரையும், வில்வண்டியும் கட்டிக்கொண்டு, கருத்த உடம்பும், கழுத்தில் வெண்சங்கு மாலையும் போட்டுக்கொண்டு ஊருக்குள் நடமாடுவாராம். நான் சொல்லுவது எழுபது எண்பது வருசத்துக்கு முந்தி. மூக்குக் கருத்து, முதுகெல்லாம் வெளுத்து, நல்ல காட்டெருது கனத்தில் கிண்ணென்று நிற்கும் காளை ஒன்று அவர் வளர்ப்பிலே சிறந்த வித்து என்று வெளியூர் வரைக்கும் பேர் இருந்தது. ஆட்களெல்லாம் வண்டிகட்டிக்கொண்டு வந்து அந்த மாட்டை விலைக்குப் பேசுவார்களாம். “காளிப்பட்டிச் சந்தையில் வாங்கிவந்த நேர்விருத்தி இவன். அஞ்சாறு தலைமுறை தொட்டு வந்த  கலப்பில்லாத ஆண் வாரிசு. பிள்ளை மாதிரி இருப்பவனை விக்கவா கொடுப்போன். போவே அந்தப் பக்கம்” விரட்டித் தள்ளுவாராம். உழுவதற்…

அவளும் நானும் அலையும் கடலும் | நூல் வெளியீடு நிகழ்வு

ஒன்பது சிறுகதைகள் எழுதி முடித்து கைவசம் இருந்தன. ‘ஊருக்குச் செல்லும் வழி’ என்கிற கட்டுரைத்தொகுப்பு வெளியாகி, விற்பனைக்கு வந்து ஒரு மாதம் கூட முடிந்திருக்கவில்லை. அடுத்து எந்தப் பக்கம் கவனத்தைச் செலுத்த என்கிற மனத்தடையோடு நிற்கிறபோது இந்தச் சிறுகதைகளை எல்லாம் ஒரு ரவுண்டு திரும்ப வாசிக்கிற சூழல் அமைந்தது. ஊழ்வினை நம்மைச் சும்மாய் இருக்க விடாதில்லையா... 
அத்தனையையும் சீர்பார்த்து, முடிக்கிறபோது  ‘மைதீன் முதலாளி’ என்கிற தேங்காய்ப் பட்டணத்து கருவாட்டு வியாபாரியின் கதையான  “வள்ளம்” தனித்துவமாக மின்னி நின்றது. அதை உட்கார்ந்து ஓர் நாள் இரவு முழுக்க எழுதித் திருத்திவிட்டு, ஜோ டி குரூஸ் சாருக்கு அனுப்பிவைத்தேன்.

 "தம்பி.
நாற்பது வருடங்களுக்கு முன்னால் தேங்காப்பட்டனம் கடற்கரையில் நின்றபடி பாடு கேட்டது போலிருந்தது. ஆங்கில மாதங்களையே கேட்டுப் பழகிவிட்ட இன்றைய நிலையில் சித்திரைப்பாடு என்ற வார்த்தைப் பிரயோகமே கதைசொல்லி கார்த்தியோடு மனதளவில் நெருக்கமாக்கி விட்டது. சொன்ன சொல்லுக்கு மருவாதியோடு அறம் சார்ந்து வாழ்ந்தவர்கள் அன்று இருந்தார்கள். சிங்களத்தானுக்கு நம்ம ஊரு கருவாட்டைக…

அவளும் நானும் அலையும் கடலும்

மழை இன்னும் கொட்டித் தீர்த்தபடியேதான் இருந்தது. நாளைக்குச் சந்திக்கலாம் என்று கடைசியாக ஒரு குறுஞ்செய்தி வந்திருந்தது அவளிடமிருந்து. கொடிய இரவின் நீளத்திற்கு அது இன்னமும் அகலத்தைக் கொடுத்துக் கொண்டிருந்தது. போகலாமா வேண்டாமாவென்ற குழப்பம் ஒருபக்கம். போனாலும் என்னத்தைப் பேசுவது புரண்டு புரண்டு படுக்கிறேன் உறக்கம் பிடிக்கவில்லை கண்களுக்கு.
முதல்தடவை திருவான்மியூர் புத்தகக்கடையில் அவளைச் சந்திக்கும்போதே நீண்டநாளாகத் தெரிந்தவனைச் சந்தித்தது போல, அவளாகவே பெயரைச் சொல்லி அழைத்தாள். கிட்டேவந்து, ‘உங்க புக் வாங்கத்தான் வந்தேன்’ என்றாள். பெயரைச் சொல்லி அறிமுகப் படுத்திக் கொண்டாள். படித்துக்கொண்டே ஏதோ ஒரு என்.ஆர்.ஐ ட்ரஸ்ட்டில் இயங்குவதாகச் சொன்னாள். கையில் வறீதையா கான்ஸ்தந்தின் எழுதின ‘என்னைத் தீண்டின கடல்’ இருந்தது. வெள்ளை நிற சல்வார், வெறும் நெற்றி, குதிரைவால் தலைமுடி என்று எந்த களேபரங்களும் இல்லாமல் பளிச்சென்று சிரித்தாள்.
*
இரண்டாவது தடவையில் எழும்பூர் ரயில் நிலைய நடைமேடையில் எதேச்சையாக அந்தச் சந்திப்பு நிகழ்ந்தது. மின்சார ரயிலில் இப்போதுதான் வந்திறங்கியதாகச் சொன்னாள். “நீங்க!?” என்ற அவளுடைய…