Skip to main content

ஆடுகளாய் இருங்கள்


Related image

ஒன்றா உலகத்து உயர்ந்த புகழல்லால் 
பொன்றாது நிற்பதொன் றில்.
                                                                            -குறள் 233

        எங்கே விழுகிறோமோ அந்த இடத்திலே எழவேண்டும் என்பார் என் முன்னாள் நண்பர். அதற்கு அவர் கைகாட்டுவது குதிரையைத்தான். குதிரை மாதிரி இருக்கணும் நண்பா என்பார். அதுதான் விழுந்த இடத்திலே எழுந்து ஓட ஆரம்பிக்கிற விலங்கு. தன்னம்பிக்கையின் சூத்திரதாரி. நண்பரைப் பொறுத்தவரைக்கும் குதிரை என்பது அவரது மோட்டிவேஷன் ஐகான்.

அதேப்போல எனக்கும் ஓர் விலங்கு உண்டு. அது வேறொன்றுமில்லை ஆடு தான் அது. சாதாரண ஆடு அல்ல அது. கர்ப்பிணியாக இருக்கும் பெண் ஆடு. ஏன் எப்படி என்பதற்கு எழுத்தாளர் பாலகுமாரன் எழுதின சில வரிகளை நினைவில் இருந்து எழுதுகிறேன்.

“உலகிலேயே ஆடுகள் மண்டையால் முட்டி சண்டையிட்டுக் கொள்வதுபோல ஒரு முட்டாள்தனமான காரியம் இல்லை. ஆனால் கர்ப்பிணி ஆடுகள் ஒருபோதும் அப்படிச் செய்வதில்லை.

நிறைமாத கர்ப்பிணிக்கு தன் கருவின் மீது அபார நம்பிக்கையும், அன்பும் இருக்கும். கர்ப்பிணி அதிர்ந்து நடக்கமாட்டாள். ஆவேசம் கொள்ளமாட்டாள். அப்படிச் செய்தாள் நஷ்டம் அவளுக்கே. மாறாக, ஒவ்வொரு அடியும் கவனமாக எடுத்து வைப்பாள்.

நீ செய்து முடிக்க வேண்டிய காரியத்தை, ஏதோ ஓர் ஆளாக வேண்டிய விருப்பத்தை, ஏதோ ஒரு கர்ப்பிணி பெண் தாங்குவதைப் போலத் தாங்கு. எல்லா நேரமும், எதைச் செய்தாலும் கர்ப்பிணியின் சிந்தனைக் கருவிலே இருப்பதைப் போல, உன் உயர்வு குறித்த சிந்தனை உன்னிடம் இடையறாது இருக்கவேண்டும்.

வீண் வம்பிலோ, வீண் வழக்கிலோ ஈடுபட விரும்பாது எங்கேனும் சிக்கினாலும் நகர்ந்துகொள்கிற கர்ப்பிணியாய் இரு. கர்ப்பிணி தன் கருவை நேசிப்பதைப் போல, உன்னையும் நீ நேசிக்க வேண்டும். உன்னை நீ நேசிப்பது உன் நடையில், உன் உடையில் உன் பேச்சில், உன் செயலில் வெளிப்படும்.

பணிவாகவும் தெளிவாகவும் பேசு; சின்ன வாக்கியங்களை நிதானமாகப் பேசு. இன்றைக்குள்ள நிறைய இளைஞர்களுக்குப் பேசத் தெரியாது. உச்சரிப்பு சரி கிடையாது. காரணம் மொழியோடு பரிச்சயமில்லை. இதற்குக் காரணம் புத்தகங்களோடு தொடர்பில்லாததுதான்.

தினம் நாற்பது திருக்குறள்களை சத்தம்போட்டுச் சொல். அதன் அர்த்தத்தை உள்வாங்கு. திருக்குறளில் சொல்லி இருப்பதைப்போல் நடக்க முற்படு. நிதானமாகப் பேச முடியும். உன் மொழியில் உள்ள நல்ல நூல்களோடு உனக்குப் பரிச்சயம் உண்டெனில், உன் வாழ்க்கை சுகமாக ஆரம்பிக்கும். நீ தெளிவாகப் பேச, உன் எதிராளிக்கும் உன்னைத் தெளிவாகப் புரிய, ஆரம்பத் தொடர்பு நல்ல முறையில் இருக்கும்.

நடையில் பேச்சில் நேர்த்தி வரும்போது உன் செயலில் தன்னாலே மாற்றம் வரும். வேலையை முழுமையாக விரும்பிச் செய்வாய். வேலையை நேசித்துச் செய்கிறபோது வேலைகள் குவியும். நிறைய வேலை செய்தால் வீண்பேச்சு குறையும். வீண்பேச்சு குறைவான இடத்தில் சச்சரவே எழாது.

ஆனால், வாழ்க்கை அத்தனை சுலபமானதில்லை. நீ சரியாக இருந்துவிட்டால் எல்லாம் சரியாகிவிடாது. நீ சரியாக இருக்கிறாய் அல்லது இருக்க முயற்சிக்கிறாய் என்பது தெரிந்தால் போதும். உன்னைக் கலைக்க பல மிருகங்கள் வரும். உன்னைக்கவிழ்க பலர் உறவாகவோ நட்பாகவோ வருவார்கள். அவர்களிடமிருந்து விலக முடியாத சூழல்கூட உருவாகும்.
தன் தேவையையும் பலத்தையும் முற்றும் உணர்ந்தவன் இவர்களை அமைதியாகச் சமாளிப்பான்.அவர்கள் பக்கமிருந்தும் விலகியும் தாமரை இதழ் தண்ணீரைப் போல் ஒட்டியும் ஒட்டாமலுமிருப்பான்.

சண்டை போடுகிற தகப்பன்,ஏமாற்றுகிற தமையன், கட்டிப்போடு என்கிற தாய், சுமக்கச் சொல்கின்ற தங்கை, ஏளனம் செய்கின்ற காதல், இங்கிதம் இல்லாத நண்பன் என்று உலகத்தில் பல வேதனைகள் உண்டு. மறுக்காதே ஏற்றுக்கொள். இவர்களைவிட்டு எங்கும் விலகமுடியாது. இவர்களோடு வாழத்தான் வேண்டும். மனத்திற்குள்ளே அவர்களிடம் விலகி இரு. உன் வேலைகளைக் கவனித்தபடியே இரு”

இப்படியாக ஒரு நான்கு பக்கத்துக்கு பாலா எழுதின பத்திகளை ஏழெட்டு ஆண்டுகளுக்கு முன்னால் படித்திருக்கிறேன். என்னை ஓரளவுக்குத் தெளிவாகச் சிந்திக்க வைத்தம் நிதானமாக யோசிக்கவும் செயல்படவும் வைத்த புத்தகம் அது.

அதன் முன்னுரையில் கூட இயக்குநர் ஷங்கர் சொல்லி இருப்பார். "You Moved Me Bala இந்த மூன்று அத்யாயங்களையும் கிழித்து என் ட்ரெஸ்ஸிங் டேபிளில் ஒட்டிக்கொண்டிருக்கிறேன்” என்று.

ஆக, கர்ப்பிணி ஆடுகளாக இருப்பது அவ்வளவு சுலபமும் இல்லை. அவ்வளவு கடினமுமில்லை என்பதாக நான் பாலாவிடமிருந்து கற்றுக்கொண்டேன்.

-கார்த்திக் புகழேந்தி 
02-03-2017.


Comments

  1. // தினம் நாற்பது திருக்குறள்களை சத்தம்போட்டுச் சொல். அதன் அர்த்தத்தை உள்வாங்கு. திருக்குறளில் சொல்லி இருப்பதைப்போல் நடக்க முற்படு. நிதானமாகப் பேச முடியும். உன் மொழியில் உள்ள நல்ல நூல்களோடு உனக்குப் பரிச்சயம் உண்டெனில், உன் வாழ்க்கை சுகமாக ஆரம்பிக்கும். நீ தெளிவாகப் பேச, உன் எதிராளிக்கும் உன்னைத் தெளிவாகப் புரிய, ஆரம்பத் தொடர்பு நல்ல முறையில் இருக்கும். //

    இதை விட என்ன வேண்டும்...?

    வாழ்த்துகள்...

    நன்றிகள் பல...

    ReplyDelete

Post a Comment

மேலான விமர்சனங்கள் வரவேற்கப்படுகின்றது

Popular posts from this blog

‘நல்ல சுழி சல்லி மாடு’ - ஜல்லிக்கட்டு ஒரு கிராமத்தான் கதை

            பால்க்காரக் கோனாரிடம் கதைகேக்கப் போனால் அவர் முதலில் சொல்ல ஆரம்பிக்கிறது மாடுகளின் கதையைத்தான். அப்படி மாடுமாடாய் வரிசைக்கு நிறுத்தி அவர் சொன்ன கதைகளில் ஒன்றுதான் அய்யமுத்துத் தாத்தனின் கதை. எங்கள் வட்டாரமான திருநெல்வேலியில் சல்லிக்கட்டு விளையாட்டுக்கென்று காளை வளர்ப்பவர்கள் ஒன்றிரண்டு பேர் இருந்தார்கள். அய்யமுத்து தாத்தா அதிலொருத்தர். நல்ல வளர்த்தியான பாராசாரிக் குதிரையும், வில்வண்டியும் கட்டிக்கொண்டு, கருத்த உடம்பும், கழுத்தில் வெண்சங்கு மாலையும் போட்டுக்கொண்டு ஊருக்குள் நடமாடுவாராம். நான் சொல்லுவது எழுபது எண்பது வருசத்துக்கு முந்தி. மூக்குக் கருத்து, முதுகெல்லாம் வெளுத்து, நல்ல காட்டெருது கனத்தில் கிண்ணென்று நிற்கும் காளை ஒன்று அவர் வளர்ப்பிலே சிறந்த வித்து என்று வெளியூர் வரைக்கும் பேர் இருந்தது. ஆட்களெல்லாம் வண்டிகட்டிக்கொண்டு வந்து அந்த மாட்டை விலைக்குப் பேசுவார்களாம். “காளிப்பட்டிச் சந்தையில் வாங்கிவந்த நேர்விருத்தி இவன். அஞ்சாறு தலைமுறை தொட்டு வந்த  கலப்பில்லாத ஆண் வாரிசு. பிள்ளை மாதிரி இருப்பவனை விக்கவா கொடுப்போன். போவே அந்தப் பக்கம்” விரட்டித் தள்ளுவாராம். உழுவதற்…

அவளும் நானும் அலையும் கடலும் | நூல் வெளியீடு நிகழ்வு

ஒன்பது சிறுகதைகள் எழுதி முடித்து கைவசம் இருந்தன. ‘ஊருக்குச் செல்லும் வழி’ என்கிற கட்டுரைத்தொகுப்பு வெளியாகி, விற்பனைக்கு வந்து ஒரு மாதம் கூட முடிந்திருக்கவில்லை. அடுத்து எந்தப் பக்கம் கவனத்தைச் செலுத்த என்கிற மனத்தடையோடு நிற்கிறபோது இந்தச் சிறுகதைகளை எல்லாம் ஒரு ரவுண்டு திரும்ப வாசிக்கிற சூழல் அமைந்தது. ஊழ்வினை நம்மைச் சும்மாய் இருக்க விடாதில்லையா... 
அத்தனையையும் சீர்பார்த்து, முடிக்கிறபோது  ‘மைதீன் முதலாளி’ என்கிற தேங்காய்ப் பட்டணத்து கருவாட்டு வியாபாரியின் கதையான  “வள்ளம்” தனித்துவமாக மின்னி நின்றது. அதை உட்கார்ந்து ஓர் நாள் இரவு முழுக்க எழுதித் திருத்திவிட்டு, ஜோ டி குரூஸ் சாருக்கு அனுப்பிவைத்தேன்.

 "தம்பி.
நாற்பது வருடங்களுக்கு முன்னால் தேங்காப்பட்டனம் கடற்கரையில் நின்றபடி பாடு கேட்டது போலிருந்தது. ஆங்கில மாதங்களையே கேட்டுப் பழகிவிட்ட இன்றைய நிலையில் சித்திரைப்பாடு என்ற வார்த்தைப் பிரயோகமே கதைசொல்லி கார்த்தியோடு மனதளவில் நெருக்கமாக்கி விட்டது. சொன்ன சொல்லுக்கு மருவாதியோடு அறம் சார்ந்து வாழ்ந்தவர்கள் அன்று இருந்தார்கள். சிங்களத்தானுக்கு நம்ம ஊரு கருவாட்டைக…

அவளும் நானும் அலையும் கடலும்

மழை இன்னும் கொட்டித் தீர்த்தபடியேதான் இருந்தது. நாளைக்குச் சந்திக்கலாம் என்று கடைசியாக ஒரு குறுஞ்செய்தி வந்திருந்தது அவளிடமிருந்து. கொடிய இரவின் நீளத்திற்கு அது இன்னமும் அகலத்தைக் கொடுத்துக் கொண்டிருந்தது. போகலாமா வேண்டாமாவென்ற குழப்பம் ஒருபக்கம். போனாலும் என்னத்தைப் பேசுவது புரண்டு புரண்டு படுக்கிறேன் உறக்கம் பிடிக்கவில்லை கண்களுக்கு.
முதல்தடவை திருவான்மியூர் புத்தகக்கடையில் அவளைச் சந்திக்கும்போதே நீண்டநாளாகத் தெரிந்தவனைச் சந்தித்தது போல, அவளாகவே பெயரைச் சொல்லி அழைத்தாள். கிட்டேவந்து, ‘உங்க புக் வாங்கத்தான் வந்தேன்’ என்றாள். பெயரைச் சொல்லி அறிமுகப் படுத்திக் கொண்டாள். படித்துக்கொண்டே ஏதோ ஒரு என்.ஆர்.ஐ ட்ரஸ்ட்டில் இயங்குவதாகச் சொன்னாள். கையில் வறீதையா கான்ஸ்தந்தின் எழுதின ‘என்னைத் தீண்டின கடல்’ இருந்தது. வெள்ளை நிற சல்வார், வெறும் நெற்றி, குதிரைவால் தலைமுடி என்று எந்த களேபரங்களும் இல்லாமல் பளிச்சென்று சிரித்தாள்.
*
இரண்டாவது தடவையில் எழும்பூர் ரயில் நிலைய நடைமேடையில் எதேச்சையாக அந்தச் சந்திப்பு நிகழ்ந்தது. மின்சார ரயிலில் இப்போதுதான் வந்திறங்கியதாகச் சொன்னாள். “நீங்க!?” என்ற அவளுடைய…